رامينا نيوز

Helbestin Evîn İBRAHÎM 

Na...

Ne bitenê

Sir û serma 

Lê hezkirin jî

Wiha...

Me dilerizîn e!

++++++++++

Helbestê nenivîsîne

Bes e...

Ku tu rojekê

Li wêneya Jineke ku tu jê hez dike

Binere

Û bilerize

Na, wê nenivîsîne!

++++++++++

Dema tu radikeve

Tu bi kû ve diçe?

Di kîjan gerdûnê de

Periyên te avjeniyê dikin

Li ser zendên kîjan Xwedawendî

Semayê dikin?

Gelo...

Ma ev giyanê te ye

Ku niha di nîvê dilê min de

Dinivîsîne?

Ey bejna rîhana min

Ey mala min î biçûk

Ey hespê spî ku li ser berfê dibezî.

Dema tu radikevî

Giyanê te bi kû ve diçe?

Ta ku ev bêrîkirin

Di nav tiliyên min de vêdikeve

Û dema ku dibim

Parzemînek ji tozê.

Ey Taca hebûna min î

Ku bi pirpirîkên Xwedan

Û bi firmêskên firişteyan dagirtî.

Jin di evînê de wernabe

Ew bi tenê qurzîkeke biçûk

Ji canê evîndar bi xwe re dibe

Wiha şevan ew ...

Di nîvê dilê wî de rawestiyayî dimîne

Da ku êdî bikaribe

Li wir xwe vemidîne.

Ey rîhana demê

Ey êşa avê

Ku sîka min

Li ser çuqliyên daran

Rûyê bêrîkirinê vêdixîne.

Jin di evînê de wernabe

Lê wekî perwaneya ku zêdeyî çarde rojan najî

Ew xwe wer dike

Hizirîneke bedew e

Wiha...

Bizirokên baranê

Bi pencereyê dûkel dibe

Wiha...

Bi şadî û di himêza bîstikên berbangê de dimire

Daristan e û wiha...

Bê pî ber bi asoyê ve direve

Daristan e û wiha...

Bitenê û dawiya şevê

Li ser milên deryayê radikeve.

Delalê min:

Na...Jin di evînê de wernabe

Ew bitenê xwe bi baskên evînê ve girêdide

Wiha ew ji ber ew ê valahiya di dilê xwe de direve

Valahiya....ku gerdûnê dadiqurtîne

Da careke din wê ji nuh biafirîne

Ew bitenê li dilê mêrekî xemgîn dilikume

Mêrekî bê hiş, yan jî şepal

Mêrekî ku ji bilî werbûnê

Bikêrî tiştekî din nayê!

Werbûna rojan e

Li ser zemîneke sar

Ku jê re dibêjin jiyan.

Hela ji min re bibêje

Lo...

Dema tu radikeve

Giyanê te bi kû ve diçe?

Di kîjan gerdûnê de

Periyên te avjeniyê dikin?

Û li ser zendên kîjan Xwedawendî

Semayê dikin?